Friday, 24 June 2011

Allah Hoo, Allah Hoo

Allah Hoo, Allah Hoo


maalikul mulk la shariika lahu
vaahdahu la ilaaha illa hu
Shams Tabrez gar Khuda talaabi
khusbuukhaaN la ila illa hu

Kaunain ka masjuud hai maabuud hai tu
har shai terii shaahid hai ke mash’uud hai tu
har ek ke lab par hai terii hamd-o-sanaa
har soz meN har saaz meN maujuud hai tu

tere hi naam se har ibtida hai
tere hi naam tak har intiha hai
terii hamd-o-sanaa, alhumdulillah
ke tuu mere Muhammad kaa Khudaa hai

Allah hu Allah hu
Allah hu Allah hu

ye zamiin jab na thi, ye jahaaN jab na tha
chaaNd suraj na the, aasmaaN jab na tha
raaz-e-haq bhii kisii par ayaaN jab na tha
jab na tha kuch yahaaN, tha magar tu hi tu

pahuNche meraj meN arsh tak Mustafa
jab na maabuud-o-bande meN pardaa raha
tab malaik ne Hazrat se chhup kar kaha
saarii maKhluq meN haq-numaa tu hi tu

kyuuN piyaa ibn-e-Haider ne jaam-e-fana?
Khaal khichvaa’ii Tabrez ne kyuN bhala?
daar par chaRh kar Mansoor ne kya kaha?
sab bana ke khilone raha tu hi tu

Khaaliq-e-kul hai tuu ismeN kyaa guftugu
saare aalam ko hai teri hi justuju
teri jalvaagarii hai ayaaN chahaar-su
laa sharika lahu, maalik-e-mulk tu

har shai tere jamaal kii aaina-daar hai
har shai pukaarti hai tu parvardigaar hai

teri rabuubiyat kii adaa ko kamaal hai
tu rabb-e-qaaynaat hai, tu laa-zavaal hai

tu jo har aan nayii shaan dikha deta hai
diidaa-e-shauq ko hairaaan bana deta hai
Daalii Daalii terii takhliiq ke gun gaati hai
pattaa pattaa terii qudrat kaa pata deta hai

laa ilaahaa terii shaan yaa! vaadahuu
tu Khayaal-o-tajassus, tuu hii aarzu
aaNkh kii roshnii, dil ki aavaaz
tha bhii tu, hai bhi tu, hogaa bhii tu

No comments:

Post a Comment